საქორწინო თაიგული: როგორ შევარჩიოთ იდეალური ყვავილები და მათი სიმბოლური მნიშვნელობა

ქორწილის დღეს საქორწინო თაიგული პატარძლისთვის არა მხოლოდ ლამაზ აქსესუარს წარმოადგენს, არამედ ღრმა სიმბოლურ დატვირთვასაც ატარებს. ხშირად პატარძლები დიდ ყურადღებას აქცევენ კაბას, მაგრამ ავიწყდებათ, რომ ფოტოებში თაიგული თითქმის სულ ჩანს. მისი სწორად შერჩევა აუცილებელია, რათა შეიქმნას ჰარმონიული და დახვეწილი სახე.

როგორც ფოტოგრაფი, ხშირად მინახავს, როგორ უჭირთ პატარძლებს მძიმე თაიგულის ტარება ან როგორ ჭკნება ყვავილები შუა დღისით. ამ ბლოგში გაგიზიარებთ წესებს, რომლებიც დაგეხმარებათ პატარძლის თაიგულის შერჩევა სწორად წარმართოთ.

საქორწინო თაიგულის შერჩევა: 5 მთავარი წესი

1. ჰარმონიულობა და სტილი

თეთრ, სინაზის გამომხატველ კაბას არ მოუხდება ზედმეტად ჭრელი და მკვეთრი ფერების საქორწინო თაიგული. ასეთი ძლიერი კონტრასტი ყურადღებას გაფანტავს და პატარძლის საერთო იერსახეს დაარღვევს. გახსოვდეთ: თაიგული უნდა ავსებდეს კაბას და არა ეჯიბრებოდეს მას.

2. მაკიაჟთან შეხამება

ეს დეტალი ბევრს ავიწყდება. თუ ბუკეტი მკვეთრი ფერებისაა (მაგალითად, წითელი ვარდები), მაკიაჟიც შესაბამის, თბილ ტონალობაში უნდა იყოს შესრულებული, რათა სახე არ გაფერმკრთალდეს.

3. ზომა და წონა – ფოტოგრაფის რჩევა

სასურველია ბუკეტი არც ძალიან დიდი იყოს და არც მძიმე. გახსოვდეთ, რომ მისი ტარება მთელი დღის განმავლობაში მოგიწევთ. ფოტოებშიც პატარა, აკურატული და დახვეწილი თაიგული ბევრად უკეთ და ელეგანტურად გამოიყურება, ვიდრე უზარმაზარი კომპოზიცია, რომელიც კაბის დეტალებს ფარავს.

4. სიახლის შენარჩუნება

ქორწილი მთელ დღეს გრძელდება. ყვავილები რომ არ დაჭკნეს, ფლორისტს სთხოვეთ გამოიყენოს სპეციალური წყლის კაფსულა ღეროებისთვის. ასევე, პატარძლის თაიგულის შერჩევა-სას მოერიდეთ მძაფრი სუნის მქონე ყვავილებს, რათა ამან თავის ტკივილი ან ალერგია არ გამოიწვიოს.

5. დეტალები: სიძის ბუტონერი და თმა

იდეალური კადრისთვის საჭიროა წყვილი ერთმანეთს ავსებდეს. ბუკეტის იდენტური სიძის ბუტონერი (პატარა ყვავილი პიჯაკზე) დახვეწილ და შეკრულ იერს ქმნის. ასევე, თუ ვარცხნილობაში ყვავილებს იყენებთ, სასურველია ისინი ბუკეტშიც იყოს წარმოდგენილი.

ყვავილების ფერის სიმბოლური მნიშვნელობა

იცით თუ არა, რომ საქორწინო თაიგული თავისი ფერით გარკვეულ გზავნილს ატარებს? აი, რას ნიშნავს თითოეული მათგანი:

• თეთრი – უბიწობა, სინაზე და ახალი დასაწყისი.
• ვარდისფერი – სუფთა სიყვარული, რომანტიკა და ახალგაზრდობა. იდეალურად ერწყმის თეთრ ან რძისფერ კაბას.
• წითელი – ვნებამორეული გრძნობა და ენერგია.
• ლურჯი – ერთგულება და სტაბილურობა.
• იისფერი – სიმშვიდე, ნდობა და სამეფო ღირსება.
• ყვითელი – ტრადიციულად ფარულ ვნებას ან განშორებას ნიშნავდა, თუმცა თანამედროვე ქორწილებში ის მზესთან და სიხარულთან ასოცირდება.

რჩევა: კლასიკური ვარიანტია თეთრი ყვავილები მწვანე ფოთლებით. თანამედროვე ტენდენციები კი გვაძლევს საშუალებას გამოვიყენოთ: ვარდები, ფრეზიები, ტიტები, იები და ზიზილები. ტრადიციულად, არასასურველად მიიჩნევა მიხაკების, კალას ან გლადიოლუსების გამოყენება, თუმცა არჩევანი თქვენს გემოვნებაზეა.

ტრადიცია: ვის დარჩება თაიგული?

ქორწილის კულმინაცია არის მომენტი, როცა პატარძალი თაიგულს ზურგშექცევით ისვრის – ეს გათხოვების სიმბოლოდ მიიჩნევა და მას გასათხოვარი გოგონები იჭერენ. თუმცა არსებობს კიდევ ერთი, ძალიან ლამაზი ტრადიცია: ზოგ ქვეყანაში თაიგულს შლიან და თითოეულ სტუმარს ცალკეულ ყვავილს გადასცემენ, რათა არავინ დარჩეს გულდაწყვეტილი და ყველამ წაიღოს სიყვარულის ნაწილი სახლში.